Powered by Blogger.

ශ‍්‍රී ලංකා ක‍්‍රිකට් අසරණයි – ජයසූරිය එංගලන්ත සංචාරයක් මුව විටේ තිබියදී පෝල් ෆාබ්‍රේස් ශ්‍රී ලංකා ක්‍රිකට් පුහුණුකරු තනතුරෙන් ඉල්ලා අස්වීම හේතුවෙන් ශ්‍රී ලංකා ක්‍රිකට් ක්ෂේත්‍රය හදිසියේම අසරණ තත්වයකට පත් කොට ඇති බව සනත් ජයසූරිය පවසයි.
ෆාබ්‍රේස් පුහුණුකරු තනතුරට පත් කිරීම පිණිස ජයසූරිය ප්‍රබල කාර්යභාරයක් ඉටු කළේය.
ශ්‍රී ලංකා ක්‍රිකට් බලධාරීන්ගේ සැලකීම් පිළිබඳව හටගත් කනස්සල්ල හේතුවෙන් පුහුණුකරු හදිසියේම සමුගත් බවට පළ වන වාර්තාද නියෝජ්‍ය අමාත්‍ය සනත් ජයසූරිය ප්‍රතික්ෂේප කරයි.
එංගලන්ත කණ්ඩායමේ නියෝජ්‍ය පුහුණුකරු තනතුර භාර ගැනීම පිණිස ෆාබ්‍රේස් ශ්‍රී ලංකා පුහුණුකරු තනතුරෙන් ඉවත්ව යන බව ජනමාධ්‍ය වාර්තා කරයි.
එය ඉතා කණගාටුදායක තත්වයක් බව පවසන සනත් ජයසූරිය, කෙසේ නමුත් ඔහුගේ අනාගතයට තමන් සුභ පතන බවද පැවසීය.
ග්‍රැහැම් ෆෝඩ්ගෙන් අනතුරුව ඔහු පුහුණුකරු තනතුරට පත් කිරීම සඳහා තමා ප්‍රධාන කාර්භාරයක් ඉටු කළ බව පිළිගන්නා තේරීම් කමිටු සභාපතිවරයා, හදිසියේම සමු ගන්නා බවක් ෆාබ්‍රේස් තමන්ට හෝ ශ්‍රී ලංකා ක්‍රිකට් පරිපාලනයේ කිසිවකුටත් දැනුම් නොදුන් බවත් පවසයි.
1996 දී ශ්‍රී ලංකාව ලෝක කුසලානය දිනාගත් අවස්ථාවේ ක්‍රීඩකයන්ට විශේෂ සැලකිලි ලැබුනත්, තමන් නොසලකා හැරීමකට ලක් වූ බව එවකට පුහුණුකරු වූ ඩී වට්මෝර් පවසා තිබුණි.
එහෙත් පෝල් ෆාබ්‍රේස්ට නිසි පිළිගැනීම ලැබුණු බව සනත් ජයසූරිය කියා සිටියේ ය.
“සමහර වෙලාවට අපි ගොඩක් වෙලාවට බලනවා ක්‍රිකට් ආයතනයට ඇඟිල්ල දික් කරන්න හැම තිස්සෙම,” යනුවෙන් ඔහු පැවසිය.
හදිසියේ යලි පුහුණුකරුවකු පත් කළ නොහැකි බැවින් මාවන් අතපත්තු ඇතුළු පුහුණුකරුවන් පිරිසට මේ මොහොතේ ප්‍රබල වගකීමක් භාර වන බවත් සනත් ජයසූරිය කියා සිටියේය.
“අවාසනාවකට අපි ටිකක් අසීරු තත්වයකට පත්වෙලා ඉන්නේ. අයර්ලන්ත සංචාරයත්, එංගලන්ත සංචාරයත් අත උද තියෙද්දී තමයි මේ ප්‍රශ්නෙට මුහුණ දෙන්න සිද්ද වුනේ. ඉතින් මේ වෙලාවේ ශ්‍රී ලංකා ක්‍රිකට් අසරණ තත්වයකට පත්වුණු විදියක් තමයි මට පෙන්නේ මේ පුහුණුකරු ගිය එකෙන්”  යනුවෙන්ද ඔහු පැවසීය.

0 comments

Post a Comment

මෙතෙක් අය ආපු අය

දැන් ඉන්න අය