Powered by Blogger.

එදා මම කතාව මැදින්නෙ පටන් අරන් තියෙන්නේ. ඊට කලින් වෙච්ච සිදුවීමක් මේකට සම්බන්ධයි.
ළමා කාලේ මගේ පුරුද්දක් තිබුණා චිත්‍රපටයක් බලලා ආවාම පවුලේ කට්ටිය හිනා ගස්සන්න. ඒ අය රඟපාපු හැටි විශේෂයෙන් අධි තාත්වික රඟපෑම – රඟපාලා පෙන්නන්න. මේ විදියට රඟපාලා පෙන්වන එක දවසක ලක්ෂ්මන් අයියත් ගෙදර හිටියා. අයියා මගේ රඟපෑම් බලාගෙන ඉඳලා කිව්වා,
‘ලොකු අම්මේ හැමදාම ගෙදර රඟපපා ඉන්නේ නැතිව මෙයාව අරින්නකෝ හොඳ නාට්‍යයකට හරි, චිත්‍රපටයකට හරි රඟපාන්න’
‘අම්මෝ මතකනෙ, ලොකු පුතා රඟපාන්න ගිහින් වෙච්ච දේ. තාත්තා සූට්කේස් එකට ඇඳුම් දාලා එළියට විසි කරලා කිව්වා ගෙදරිනුත් පලයන් කියලා. ඕවා අහන්න ගිහින් මටත් හොඳ දෙකක් අහගන්න වෙයි’
‘ඒ වගේ එකක් නෙමෙයි ලොකු අම්මේ, හොඳ නමක් තියෙන අධ්‍යක්ෂවරයෙක්ගේ නාට්‍යයකට හරි, චිත්‍රපටයකට හරි සම්බන්ධ වුණොත් අංකල් මුකුත් කියන එකක් නැහැ. මේ දවස්වල දයානන්ද ගුණවර්ධන මහත්තය නරිබෑනා නාට්‍යය අලුතින් පටන්ගන්න ඒකේ ගම දුවට කෙල්ලෙක් හොයනවා. නංගි නම් ඒකට හොඳට ගැළපෙනවා. ලොකු අම්මා නංගි එක් කරගෙන එන්න. මම වෙලාවක් අරගෙන කියන්නම්.’
තාත්තගෙනුත් අවසරය අරගෙන මමයි, අම්මයි, අයිය කියපු වෙලාවට සුදර්ශියට ගියා දයානන්ද ගුණවර්ධන මහත්තයාව හම්බ වෙන්න. දයානන්ද ගුණවර්ධන මහත්තයා මට ඒ චරිතෙ දෙන්න කැමති වුණා ද නැද්ද කියලා මම දන්නේ නැහැ. එයා කිව්වේ නරි බෑනා නාට්‍යයට ප්‍රතිපාදන සොයමින් සිටින නිසා පුහුණුවීම් ආරම්භ කරන්න ටික කාලයක් ගත වෙයි කියලා.
චන්ද්‍රා කලුආරච්චි ඒ මොහොතෙම එතැනට ආවා. ඇවිත් මගේ දිහා බලලා හරියට හඳුණන කෙනෙක් වගේ මගේ අතින් අල්ලගෙන ලක්ෂ්මන් අයියට කිව්වා ‘අනේ ලක්ෂ්මන් මෙයාව දෙන්නකෝ ශෛලාසනේ කුමරිට. අපි ඒ නාට්‍යය දැන් රිහසල් කරනවා. ඒකේ ශක්‍ර දෙවියන්ගේ දුවට නිළියක් නැතුව තමයි රිහසල් කරන්නේ. මෙයා නම් ඒකට හොඳට ගැළපෙනවා.’
ඒ වෙන කොට චන්ද්‍රා අක්කා ප්‍රසිද්ධ නිළියක්. එයා අම්මා දිහා හැරිලා කිව්වා ‘අම්මට පුළුවන්නේ හෙට ඉඳලම මෙයාව රිහසල් එක්කර ගෙන එන්න. ඒ වෙලාවේ මම පොඩ්ඩක්වත් හිතුවේ නැහැ මේ කතා කරන්නේ ලක්ෂ්මන් අයියගේ අනාගතේ දුක සැප බෙදාගන්න ඉන්න ජීවන සහකාරිය කියලා. ඉරණම කොයි තරම් පුදුම දේවල් කරනවාද?
නරිබෑනා එකේ ගම දුව වෙන්න ගිය මම ටී. බී. ඉලංගරත්න සූරීන්ගේ ශෛලාසනය කියන වේදිකා නාට්‍යයේ ශක්‍ර දෙවියන්ගේ දියණිය වුණා. පසු කලෙක වේදිකාවෙන් ඉතා ප්‍රසිද්ධියට පත් වුණ දැවැන්තයින් මං වගේ කුඩා අංකුර නිළියකට දකින්න ලැබීම, කෙටි කලකට හෝ ඇසුරු කරන්නට ලැබීම මා ලද භාග්‍යයක් බව සතුටින් මතක් කරනවා.
ලූෂන් බුලත්සිංහල, විජය නන්දසිරි, කුවින්ටස් වීරකෝන්, වික්ටර් වික්‍රමගේ, අතුල සෝමසිරි, උපාලි අත්තනායක, චන්ද්‍රා කලුආරච්චි මේ වගේ විශාල නළු නිළි පිරිසක් මේ නාට්‍යයේ රඟපෑවා.
එහි පුහුණුවීම් කරන අතරතුර උපාලි අත්තනායක මහතා දවසක් කිව්වා නංගි සුමිත්ත අමරසිංහ මහත්තයාගේ කෙටි චිත්‍රපටයක රූප රාමු වගයකට කෙල්ලෙක් හොයනවා. මම ඔයා ගැන කිව්වා. එයා ඔයාව හම්බ වෙන්න ළඟදීම දවසක ගෙදර ඒවි කියලා. කිව්වා වගේම දවසක අති දක්ෂ කැමරා ශිල්පී සුමිත්ත අමරසිංහ මහතාත් එම බිරිඳත් අපේ ගෙදරට ආවා. ඒ පැමිණීම පසු කලෙක මගේ ජීවිතේ විශාල පෙරළියකට, සම්බන්ධයකට අත්තිවාරම් දැමීමක් වුණා.
මගෙත් රවීගෙත් සම්බන්ධයට සහ විවාහයට නොමසුරුව උදවු උපකාර කළ මට පියෙක් මවක් සේ සලකා ගෙදර නවාතැන් දී රැකවරණය සැලසූ ඒ දෙපොළ හඳුනා ගන්නට ලැබීම කල්‍යාණ මිත්‍ර සේවනය පිනක් සේ සලකන මා – මම කළ පිනක් පලදීමක් ලෙස විශ්වාස කරමි. ඒ හඳුනා ගැනිමෙන් පසු ඔහු විසින් ගන්නා ලද ඡායාරූප පෙළක් තමා සුමිත්‍රා පීරිස් මහත්මියට දකින්න ලැබී තිබුණේ.
ශෛලාසනයේ නාට්‍යයේ පුහුණුවීම් කරන අතරේ යළිත් මට ලෙස්ටර් සුමිත්‍රා යුවළගෙන් ආරාධනාවක් ලැබෙනවා දෑස නිසා චිත්‍රපටයේ නළු නිළියන් සහභාගි වෙන සාදයකට සහභාගි වෙන්නට. ඇත්තෙන්ම ඒක මුහුරත් උළෙල ද කියලා මම දන්නේ නැහැ. මගේ මතකය නිවැරැදි ද දන්නේ නැහැ. සාදය තිබුණේ රාත්‍රී කාලයේ කොල්ලුපිටියේ රේණුකා හෝටලයේ විය යුතුයි.
ආරාධනය මට විතරක් නිසා අම්මා මාව සුමිත්‍රා ඇන්ටිට භාර දීලා, ඉවර වුණාම එක් කරගෙන යන්න එන්නම් කියලා ගියා. මම එතන හිටිය කවුරුවත්ම අඳුරන්නේ නැහැ. මම හිටියේ හොඳටම බයෙන්. එදා ලෙස්ටර් සර්ගේ ගෙදර ගියා වගේ. සෙනඟ ගොඩක් මැද්දේ මාව කරකවල අත ඇරියා වගේ.

සුමිත්ත අමරසිංහ තැනූ කෙටි චිත්‍රපටය පී‍්‍රති රන්දෙනිය සහ ලාල් හේවාපතිරණ
සුමිත්‍රා ඇන්ටි වට පිට බලලා මාව එක මේසයක් ගාවට එක් කරගෙන ගියා. එතැන නෝනලා තුන් දෙනෙක් වාඩි වෙලා හිටියා. තුන් දෙනාම සාරි ඇඳලා. එක් කෙනෙක් අලුත්ම තාලෙට කොන්ඩෙ කපලා. අනිත් දෙන්නා ඒ කාලේ තිබුණ ස්ටයිල් එකට හරියට ඔළුව උඩ ගස් මුට්ටියක් නවලා වගේ ;කාණ්ඩ දෙකක් දාලා. තුන් දෙනාම හිනා වේවී කච බච ගාලා ඉංග්‍රීසියෙන් මොනවදෝ කියෙව්වා. මම කට දිහා බලාගෙන හිටියා. හැබැයි කතා කරපු එකම එක දෙබසක් තාමත් මතකයි. එක් කෙනෙක් ඇහුවා සෆර් බැලුවද කියලා. අනිත් එක්කෙනා කිව්වා මම සෆර් කරන්න කැමති නැති නිසා බැලුවේ නැහැ කියලා. ඒ දවස්වල රිට්ස් එකේ සෆර් කියලා හින්දි චිත්‍රපටයක් ප්‍රදර්ශනය කළා. ඒ දවස්වල මමත් හින්දි චිත්‍රපට ලෝලියෙක් නිසා වෙන්නැති ඒ දෙබස විතරක් මතක තිබුණේ.
සුමිත්‍රා පීරිස් මහත්මිය කොයි තරම් නිහතමානී ද, ඇයට තිබුණ හුඟාක් වැඩ රාජකාරි මැද මගේ ගැනත් හොයලා බැලුවා. සැරෙන් සැරේ මගේ ළඟට ඇවිත් අහනවා මම කෑවද, මොනව හරි බීව ද කියලා. එහෙම අහන්න තරම් මම වටිනා කෙනකුත් නෙමෙයි. ඒත් ඒ දෙන්නගේ තියෙන මනුස්සකම, මවුවත්කම කොයි තරම්ද?
මම ඉන්න තැනට ටිකක් එහාට වෙන්න නළු නිළියෝ පින්තූර ගන්නවා. ළඟින්ම පෙනුණේ නැතත් විදුලි බුබුළුවල එළියට මට ඒගොල්ලන්ව හොඳින්ම පේනවා. රවීන්ද්‍ර රන්දෙනිය, ජෝ අබේවික්‍රම, ශ්‍රියාණි අමරසේන ඒ තුන්දෙනාව හොඳින්ම මතකයි. වැඩියෙන්ම මතක තියෙන්නේ රවීන්ද්‍ර රන්දෙනිය ඇඳගෙන ආපු කමිසය. වී අකුර හැඩයට කර කපපු අත් කොට කමිසයක්. ඒ කාලේ මගේ ප්‍රියතම නළුවා රාජේෂ් ඛන්නා. ඒ කාලේ නරඹපු චිත්‍රපටයක රාජේෂ් ඒ විදියම කමිසයක් ඇඳලා තිබුණා.
ඒ නිසා මම ඒ දිහා හොඳින්ම බැලුවා. එදා රවීව දැක්කත් මට විශේෂ හැඟීමක් නොදැනුණේ ඊට කලින් අපි නාට්‍යයක් බලන්න ලයනල් වෙන්ඩ්ට් එකට ගිය වෙලාවකදී රවීත් ඇවිත් හිටිය නිසා වෙන්නැති. අඩි 6 ක් පමණ උස, කොණ්ඩෙ ක්‍රේල්, රත්තරන් පාට, මනා පෞරුෂයකින් හෙබි මේ කඩවසම් තරුණයාගේ රූපය එදා නම් මට හොඳට මතක හිටියා. එදා නම් රවී මගේ දිහා ඉතා ඕනෑකමින් දෙතුන් සැරයක්ම බැලුවා. මංජු නංගි කිව්වා එයා අක්කා දිහා බලන විදිය නම් ගානට වැඩියි වගේ කියලා. රවීගෙන් මම පසු කාලේ මේ සිද්ධිය ඇහැව්වාම කිව්වා එයාට එහෙම දෙයක් පොඩ්ඩක්වත් මතක නැහැ කියලා.
මම එදා සාදය ඉවර වෙනතුරුම ගොඩයට මැජික් වගේ හැමෝගෙම මුහුණු දිහා බල බල හිටියා මිසක් කාත් එක්කවත් වචනයක්වත් කතා කරපු බවක් නම් මතකයේ නැහැ.
එදා රෑ වෙච්ච නිසා මමයි අම්මයි, පුංචි අම්මලාගේ ගෙදර නතර වුණා. පුංචි අම්මගේ දූ මංජු නංගි, එයත් ඒ කාලේ හින්දි චිත්‍රපට පිස්සියක්. අපි දෙන්නා අතින් අල්ලගෙන නංගිගෙ කාමරයට දුවලා ගියා.
‘අක්කා කොහොමද පාටිය’
මම හැමෝගෙම කටවල් දිහා මූණවල් දිහා බලාගෙන කාත් එක්කවත් කතා නොකර හිටියත් මම කිව්වේ හරිම ෂෝක් නංගි කියලා.
‘ශ්‍රියාණි අමරසේන ලස්සනයි නේ . . .’
‘ඔව් නංගි හරිම . . . හරිම . . . ලස්ස . . . නයි’
‘ජෝ අබේවික්‍රම . . .’
‘හ්ම් . . . හොඳයි . . .’
‘අලුත් නළුවා එදා නාට්‍යය බලන්න ඇවිත් ඔයා දිහා බැලුවේ’
‘අනේ නංගි එයා අද රාජේෂ් වගේම ෂර්ට් එක්ක ඇඳගෙන ඇවිත් හිටියා.’
‘එයත් රාජේෂ් වගේද?’
‘නෑ ළමයෝ ෂර්ට් එක’
‘මෝඩයා මූණත් ටිකක් බලන්න එපැයි රාජේෂ් වගේද කියලා’
‘ෆිල්ම් කරන්න ගියාම හම්බ වෙයිනේ. එතකොට බලන්නම්’

පොත් බෙදනවා

රංගන ශිල්පිනී අනෝමා ජනාදරී
පුනරෝපකථන හා පුනරාගමන කියන මගේ කෘති දෙකේ බෙදා හැරීම් කටයුතු සමඟ මම මේ දවස්වල සැරිසරනවා. ඒ වගේම මේ මාසයේ දහ වැනිදා ලුම්බිනියේ මංගල දර්ශනය පැවැත්වීමට නියමිත ධර්මජිත් පුනර්ජීවගේ අධ්‍යක්ෂණයෙන් හැඩවුණු ‘රැගෙන අවි මම ද එමි’ වේදිකා නාට්‍යයේ තෙරේසා කරාර්ගේ චරිතයට පණ පොවනවා.
ඒ වේදිකා නාට්‍යය බර්ටෝල් බෙෂ්ට්ගේ නිර්මාණයක පරිවර්තනයක්. එය පරිවර්තනය කළේ මයිකල් ප්‍රනාන්දුයි. එහි පුහුණුවීම් සමඟ දවස ගතවෙන නිසා මම තරමක් කාර්යබහුලයි.









ඔබ රැවටූ හිත පතුලේ

ගායන ශිල්පී ලක්ෂ්මන් හේවාවිතාරණ
පසුගිය අවුරුද්දේ ඉදිරිපත් කළ ‘ඔයා ළඟින් ඈත් වෙලා’ ගීතයට ලැබෙන ප්‍රතිචාර සමඟ තවත් අලුත් ගීතයක් එළි දක්වන්න සූදානම් වෙමිනුයි සිටින්නේ. ‘ඔබ රැවටූ හිත පතුලේ’ නම් මේ ගීතය ළඟදීම එළි දක්වන්න ලෑස්ති වෙනවා.
මේ දවස්වල ඒ නිසා ටිකක් කාර්යබහුලව සිටින්නේ. ඊට අමතරව සංගීත ප්‍රසංගයක් යෙදිලා තියෙනවා. මගේ උපන් දිනයත් මේ සතියටම යෙදිලා තියෙනවානේ. ඒ වෙනුවෙන් මම කවදාවත් උත්සව පවත්වලා නම් නැහැ. සාමාන්‍ය සුපුරුදු විදියට ඒ දවසත් ගත කරනවා. සිංහල අලුත් අවුරුද්දත් ඉවර වෙලා දැන් වෙසක් උත්සවය එනකල් මඟ බලාගෙන ඉන්නවා.








ඔරුව ගිලෙන්න කලින් කැමරාව බේරගත්තා

මහේෂ් සංජීව
Behind The Scene නිර්මාණයක් තුළ නොදකින පංගු කරුවන් සොයා යන අපුරු චාරිකාවකි.
Behind The Scene හතර වැන්න තුළින් අද අප හඳුන්වා දෙන්නේ කැමරා අධ්‍යක්ෂ මහේෂ් සංජීව කරුණාරත්න යි.
හෙතෙම අපට මුණ ගැසුනෙ සිහින සක්මන ටෙලියේ කැමරා අධ්‍යක්ෂ ලෙස වැඩ කරමින් සිටියදි. ඔහු ආ ගමන් මගේ විස්තර අපට කියා පෑවේ මේ අයුරින්.
මම මේ ආ ගමන්මග හරිම සුන්දර වගේම , කටුක අත්දැකීම් වලිනුත් පිරුනු එකක් කිව්වොත් නිවැරදියි. ගාල්ල අටානකිත මධ්‍යමහා විද්‍යාලයේ අධ්‍යාපනය ලැබූ මම හයදෙනෙකුගෙන් යුත් පවුලෙ හතර වැන්නා. පාසල් කාලයේ සිටම කලාවට සම්බන්ධයි. ගාල්ලෙ හැදුනු වැඩුනු මාව කොළඹ ගෙනාවේ,මගෙ මස්සිනා වන විරාජ් නිශ්ශංකයි. ඔහු කළුබෝවිල ආර්.එස්. වීඩියෝ ආයතනයට මාව රැකියාවක් සඳහා යොමු කළා. මෙන්න මෙහෙමයි මගේ ගමන් මගේ ආරම්භය.
පළමු රැකියාව කුමක්ද?
ගෞතමි ටෙලියේ ආලෝක කරන ශිල්පියෙකු ලෙස වැඩ කිරීම .
ආලෝක කරන ශිල්පියෙකු ලෙස වැඩ ඇරඹු ඔබ, කැමරා ශිල්පියෙකු වූ අයුරු පැහැදිලි කරමු?
වසරකට වැඩි කාලයක් ආලෝක කරන ශිල්පියෙකු ලෙස වැඩ කිරීමෙන් පසුව,බූම් ඔපරේටර්,ට්‍රැක්ඩොලි ක්‍රියාකරු , ශ්‍රව්‍ය දෘශ්‍ය සහයක, ශ්‍රව්‍ය දෘශ්‍ය ශිල්පී වශයෙන් ,වසර හතරක් තුළ මේ සෑම ක්ෂේත්‍රයකම නියැළී ටෙලිනාට්‍ය 50ක පමණ වැඩ කළා. මේ සෑම ක්ෂේත්‍රයකම වැඩ කළත් මගේ වැඩි කැමැත්තක් තිබුණේ කැමරා කරණයටයි. ඒ නිසා විවේකී සෑම අවස්ථාවක්ම කැමරා කරණය ඉගෙනගන්න හිත යොමු කළා. මට කැමරා සහායකයකු ලෙස වැඩ කරන්න අවස්ථාව සලස්වා දුන්නේ ඩිල් ෆිල්ම් ආයතනයේ නිෂ්පාදන කළමනාකරු වන බුද්ධික සේරසිංහ මහතායී.මම වැඩ කළ පළමු ටෙලිය තමයි බිනරි,චිත්‍රපටය වුනේ බව තරණයි.
නිශාන්ත ප්‍රදීප් , සුමින්ද අරුණලු, සුජිත් නිශාන්ත, කිත්සිරි හේවගේ, චන්දන මංචනායක, චන්දන ධර්මප්‍රිය,යන මහත්වරුන් යටතේ ටෙලි නාට්‍ය 15ක පමණ කැමරා කරණ සහායක වශයෙන් වැඩ කිරීමෙන් ලැබූ අත්දැකීම් හා පන්නරය තුළින් තමයි මම ස්වාධීන කැමරා ශිල්පියෙකු වුණේ. කැමරා අධ්‍යක්ෂ ලෙස වැඩකර නම පළ වූ පළමු ටෙලිය වූනේ සිහින සක්මනයි.
මහේෂ් , වැඩ කරන්න පහසු අධ්‍යක්ෂකවරු කවුරුන්ද? ඒ ඇයි?
ගිහාන් රෝහන, සුරන්ජන් විජේනාම, අරුණ වරාගොඩ, ලක්ෂ්මන් පුෂ්පකුමාර, චන්දන එදිරිසිංහ, ඩිල්ෂාන් වෙල්ලාලගේ.යන මහත්වරුන් හා මට මෙතෙක් වැඩ කරන්න ලැබුණු නමනොකී සියලු අධ්‍යක්ෂ වරුන් සමඟ වැඩ කිරීමට පහසුයි.මේ සෑම කෙනාගෙන්ම මට යම් දෙයක් ඉගෙන ගන්න තිබුණා. මේ සෑම දෙනාම කිසිදු දෙයක් සඟවන්නේ නැතිව කියා දුන් අයයි. ඒ අයට අවශ්‍ය දේ හොදට ලබා ගන්න අනෙක් සියලු දෙනාව මෙහෙය වන්නේ කිසිදු කෙනෙකුගේ හිත් නොරිදෙන පරිදි වීම මේ සැමගේ විශේෂත්වයක් ලෙස මා දකිනවා.
මේ අය හැර වැඩකරන්න කැමති අධ්‍යක්ෂකවරු ඉන්නවද,ඒ කවුද?
ඔව්.නිශාන්ත ප්‍රදීප්, දේවින්ද කොන්ගහගේ මහත්වරු සමග වැඩ කරන්න කැමතියි.මොකද මම වගේම මේ අයත් ක්ෂේත්‍රයට අලුත් වුණත් වෙනස් දේ හොයා යන අය නිසයි.
කැමරා කරණය ලෙස ඔබ දකින්නේ?
පරිසරයේ තිබෙන්නාවූ සුන්දරත්වය,අඳුර හා එළිය , නිසිලෙස හසුරමින් ස්වභාවිකත්වයට මුලදී අධ්‍යක්ෂකට අවශ්‍ය පරිදි කතා මාලාවට අවශ්‍ය රූපරාමු පෙළ ගැස්වීමයි.
අමතක නොවන සිදුවීමක් ගැන කියමු?
සිහින සක්මනේ එක් දර්ශනයක් රූ ගත කළේ හොරණ වැවක ඔරුවක් උඩ ඉදන්,සහායට ආ කට්ටිය වැඩි වුණු නිසා ඔරුව ගිලෙන්න ගත්තා ,නමුත් මට පුළුවන් වුණා ඔරුව වතුරෙ ගිලෙන්න ඉස්සෙල්ල කැමරාව ගොඩට දෙන්න.යුනිට් එකේ මල්ලි කෙනෙක් රෝහල් ගත කරන්නත් වුණා.
කම්කටුලු බිද දා තම මාවතට පැමිණි ඔබට,නන්අයුරින් උදව් කළෝ කවුරුන්ද?
මගේ පවුලේ සැවොම, විරාජ් නිශ්ශංක, රොහාන් බුලත්සිංහල, නිශාන්ත ප්‍රදීප්, ඩිල්ෂාන් වෙල්ලාලගේ, ගිහාන් රෝහණ, ලක්ෂ්මන් පුෂ්පකුමාර, සුදිත් නිශාන්ත යන මහත්වරුන්ට ස්තූති කරන්නට මෙය අවස්ථාවක් කරගන්නවා.
මේ දිනවල නියැළී සිටින වැඩ කටයුතු මොනවාද?
වීණාවි , සිහින සක්මන ටෙලිනාට්‍යවල ඉතිරි වැඩකටයුතු සඳහාත්,පුරවරුන,හදරැදි ගී,පෝය කෙටි නාට්‍ය වලට සම්බන්ධ වී වැඩ කරමින් සිටිනවා.හර්ෂ උඩකන්ද මහතා අධ්‍යක්ෂනය කරන පිටකොටුව නම් නවතම ටෙලියෙ වැඩකරන්න මට කතා කරල තියෙනවා.

ගුවන් යානයේ විනෝද සමයක්

පසුගිය සතියෙන්...
ඔන්න දැන් ඉතිං රූබර ගුවන් සේවිකාවන් දැන් මම ළඟටම ඇවිල්ලා. මේ සුර දූතියන්ගේ අත රැඳි බන්දේසිවල එකිනෙක තාලෙට නැළවෙන ගැටෙන විස්කි, බ්‍රැන්ඩි, ජින්, බියර්, වයින් ටී, කෝපි, සොෆ්ට් ඩ්‍රින්ක්ස් පිරිලා. මේව දැක්කම මගේ සිතට අපූරු සිතිවිලි පහළ වෙන්න පටන් ගත්තා. දැන් මගේ හිත තුළ තිබුණ කුතුහලය බය ටිකක් අඩු වෙලා.
ගුවන් යානයේ පවතින සීතලෙන් මිදෙන්න කන් අගුල් වැටිලා තියෙන එක ටිකක් අඩු කර ගන්න, ඇඟ ටිකක් උණුසුම් කර ගන්න විස්කි වීදුරුවක් ඉල්ලගෙන මට බීමේ ආශාවක් ඇති වුණා. ඔන්න ඉතිං ඒ අස්සේ පන්සිල් මතක් වෙන්නත් පටන් ගත්තා. බයෙන් වෙව්ල වෙව්ලා ගාථාව කිය කියා ආපු මට මේ වගේ දෙයක් බොන්නත් මොකක්ද වගේ. ඇඟ සීතලෙන් ගැහෙන වෙලාවේ ඖෂධයක් වශයෙන් පොඩ්ඩක් ගත්තට වරදක් වෙන එකක් නෑ කියලත් මට හිතෙන්න වුණා. ඒත් මේ රූබර ලලනාවන්ගෙන් සැර බීම ටිකක් ඉල්ලගෙන බොන්න මට ලැජ්ජයි වගේ.
සීතල වැඩිවෙලා මගේ ඇඟ ගැහෙන එක වැඩි නිසාම හිතට ලොකු දිරියක් අරගෙන පුණ්‍යවන්ත සිතිවිලි යටපත් කරගෙන ලැජ්ජා භය තියෙන උපාසකයෙක් වගේ බ්‍රැන්ඩි ටිකක් ලලනාවකගෙන් ඉල්ලා ගත්තා. ලලනාව ටිකක් ඈත් වෙනකන් ඉඳලා මම එක හුස්මට බ්‍රැන්ඩි ටික උගුරට හලාගෙන හොඳට අසුනට ඇල වී ටික වෙලාවක් ඉන්න කොට මට ටිකෙන් ටික දැනෙන්න පටන් ගත්තා මගේ ශරීර කූඩුවේ තිබුණ සීතල ගතිය නැති වෙලා ඇඟ උණුසුම් වන ගතියක්. එතකොට මගේ හිතේ තිබුණ ලැජ්ජා භයත් මටම හොරා පැනලා ගිහින් තිබුණා.
මම ඉතිං සුර දූතියන්ගෙන් වරින්වර බ්‍රැන්ඩි ඉල්ලගෙන බොන්න පටන් ගත්තා. මගේ මේ තියෙන කෑදරකමටයි, පෙරේතකමටයි ශරීරයේ උෂ්ණත්වය ක්‍රමයෙන් ඕනෑවටත් වඩා ඉහළ නගින බවක් මට දැනෙන්න වුණා. දැන් මොනව කරන්නද? කුම්බලා මාළු කෑව නම් විඳවපන් බළලෝ කියනවා වගේ මට ශරීර කූඩුවේ ඉහළ යන උෂ්ණත්වය පාලනය කර ගන්නෙ කොහොමද කියලා අසුනට හාන්සි වෙලා මොහොතක් කල්පනා කළා. මේ විදියට උෂ්ණත්වය ඉහළ ගිහින් මාව පිච්චිලා යයිද කියලත් මට හිතුණේ නැත්තෙමත් නෑ. මේ තත්ත්වය පාලනය කරගන්න බියර් ටිකක් බිව්වොත් හොඳයි කියලා මට හිතුණ නිසාම ශරීර උෂ්ණත්වය අඩු කර ගන්න හොඳ ඖෂධයක් කියලා බියර් වීදුරු කීපයක්ම ඉල්ලගෙන බීල බැලුවා.
මෙහෙම වරින් වර බියර් ඉල්ලන් බොන කොට මට දැනුණා පපුව ගොර ගොර ගාන හඬක්. මට දෙයියො බුදුන් සිහි වුණා. සෙම ඇවිස්සුණොත් වෙන්නේ මහ ජංජාලයයි. දැන් ඉතිං මගේ හිතට අපූරු සිතිවිලි පහළ වෙන්න පටන් ගත්තා. යානයේ තියෙන වැසිකිලිය නරඹන්න යන්න හිතුණා. අහස් යාත්‍රාව ඇතුළේ ඉඳල ශරීර කෘත්‍ය කරන්න මට ආශාවකුත් ඇති වුණා. අහසේ ඉඳලා මේ වැඩේ කෙරුවනේ කියලා හිතට උජාරුවක් ඇතිකර ගන්නත් මට හිතුණා. අහසේ ඉඳලා විනෝද සමය රඟපාන්නත් මට හිතුණා.
මිනිස්සු ආශ කළ මම පොඩි ළමයට ඇඳල ඉන්න අවස්ථාව, සූප්පුව කටේ ගහලා බෝතලය, පොත් බෑග් එක කරේ දාගෙන ජම්පර් කලිසම ඇඳලා ගුවන් යානය ඇතුළේ ඇවිද ඇවිද මේකේ ඉන්න මිනිස්සු හිනස්සන්න මට හිතුණා. ඇනස්ලි, සැමුවෙල් ඉන්න තැනකින් නැගිට්ටවගෙන ප්ලේන් එකේ රඟපෑමක් කළා නම් උඩු ගුවනෙත් විනෝද සමය රඟ දැක්වෙයි කියලා පත්තරවල හෙඩින් යයි කියලත් මට හිතුණා. ඔය වගේ සිතිවිලි රාශියක් මැද අතරමං වෙලා ඉන්න කොට එන්න එන්නම වැඩේ හරි යන පාටක් නැති තරම්. ප්ලේන් එක ඇතුළේ සීත වායුව සමඟ මගේ සෙම් කෝපය තව තවත් වැඩි වුණා.
මේ වෙන කොට මගේ මෝඩකමට මමම ඕනෑකමින් නැති ලෙඩක් හදාගෙන. දැන් ඉතිං පසුතැවිලි වෙලා වැඩකුත් නෑ කියලා හිතුණා. ඒ පාර මම හිතුවා සෙමට හොඳම බේත විස්කි කියලා ගුවන් සේවිකාවන්ගෙන් විස්කි බොන්න හරි හපනෙක් වගේ විස්කි ඉල්ලගෙන වීදුරු කීපයක්ම එක හුස්මට බීල දැම්මේ හොඳ පුරුදුකාරයෙක් වගේ.

සම්මානනීය නිළිය සම ලිංගික විවාහයක

වෙනස් වෙන ලෝකයෙන් ඇසෙන්න ලැබෙන්නේ වෙනස්ම පුවත්ය. නිළි ජෝඩී ෆොස්ටර් නවීන තාලයේ විවාහයක් කර ගැනීමට සිතුවේ ඒ නිසාය. දැන් ඇය ප්‍රිය බිරියකි. ඒ සැමියකුගේ නම් නොවෙයි. තවත් කාන්තාවකගේයි. ඇය ඡායාරූප ශිල්පිනී, නිළි, ඇලෙක්සැන්ඩ්‍රා හෙඩ්සන්ය.
චිත්‍රපට නිෂ්පාදක සිඩ්නි බර්නාඩ් සමඟ දිගු කලක් සෙනෙහසින් බැඳී සිටි ඇය පුතුන් දෙදෙනකුගේ මවකි. චාල්ස් ෆොස්ටර් (1998), ක්‍රිස්ටෝනර් ෆොස්ටර් (2001) ඒ පුතුන් දෙදෙනාය. සිඩ්නි තමන්ට ආදරය කළත් නිවැරැදිම ආත්මීය සොයුරිය ඇලෙක්සැන්ඩ්‍රා බව ජෝඩී පවසන්නීය.
ජෝඩී වෙනස් අන්දමට සිතන්නේ ආදරය ගැන පමණක් නොවෙයි. ඇය ආගම ගැන සිතන්නේද නව අයුරකිනි. යුරෝපීය වේවා, ආසියානු වේවා සියලු ආගම්වලට ඇය ගරු කරන්නීය. ආගම් හදාරන්නීය.
ඇලෙක්සැන්ඩ්‍රා සමඟ විවාහවීමෙන් පසු ජෝඩී රන් පැහැ මංගල මුදුව පැලඳගෙන සිටින ඡායාරූප ශිල්පීන් පසුගියදා මාධ්‍යයට නිකුත් කරන ලදී. වසරක් ඇසුරු කළ පසු ඇලෙක්සැන්ඩ්‍රා සමඟ විවාහ වීමට ජෝඩී තීරණය කර තිබේ.
ජෝඩී දක්ෂ අමෙරිකානු නිළියකි. සිනමා අධ්‍යක්ෂිකාවකි. නිෂ්පාදිකාවකි. 1976 දී ‘ටැක්සි ඩ්‍රයිවර්’ සිනමා පටයේ ළමා ගණිකාවක ලෙස කැපී පෙනෙන රංගනයකින් සිනමාවට පිවිසි ඇය එම රංගනයට ඇකඩමි සම්මාන උළෙලේ හොඳම සහාය නිළිය ලෙස නිර්දේශ වූවාය. 1989 දී ‘දි ඇකියුස්ඩ්’ රංගනයට ඇය හොඳම නිළිය ලෙස ඇකඩමි සම්මාන දිනා ගත්තාය. එහි ඇය රැගුවේ අතවරයට පත් තරුණියකගේ චරිතයකි. ‘ද සයිලන්ස් ඔෆ් ද ලෑම්බ්ස්’ හි රහස් පරීක්ෂක රංගනයෙන් ඇයට දෙවැනි ඇකඩම් සම්මානය හිමි විය.
යළිත් වරක් ඇය හොඳම නිළියට නිර්දේශ වූයේ ‘නෙල්’ රංගනයටයි. කන්ටැක්ට්‍රි පැනික් රූම්, ෆ්ලයිට් ප්ලෑන්, ඉන්සයිඩ් මෑන්, ද බ්‍රේව් වන්, ජෝඩී ෆොස්ටර් අන්තර්ජාතික වශයෙන් කීර්තියට පත් කළ රංගනයන්ය. ඇයගේ මංගල අධ්‍යක්ෂණය ‘ලිට්ල් මෑන් ටේට්’ය. පනස් එක් හැවිරිදි ජෝඩී ඇකඩම් සම්මානවලට අමතරව සම්මාන ගණනාවකට හිමිකම් කියන්නියකි.




0 comments

Post a Comment

මෙතෙක් අය ආපු අය

දැන් ඉන්න අය